Seislertütsch
-
Seislertütsch
Seislertütsch, ma siit va dier,
, Meinrad Schaller 1909-2001
dù sygisch iigen i dym Klang.
Ùn äbe grad das rüeme wier:
Wier wii in üsùm Schwyzerlann
nit dǜrewäg de glyychig Gsang.
As darf a jeda fryya Maa
bin üüs no eppis Iiges haa!
Seislertütsch, ma siit va dier,
dù tönisch mengisch nit grad fyn.
Das isch doch Gschwätz! I sääge mier:
Wa ùf de Ärde Mänsche syn,
da git is fyys ù ggaschtets Houz,
ù jeda spǜut ds Sprachynschtrùmänt
so wyn ersch chann ù wyn ersch bchennt!
Seislertütsch, ma siit va dier,
dù sygisch nit a Sprach fùr ds Gmüet!
Ù doch tönt z ale Zyte mier
mys Hiimtütsch naa as wyn as Lied,
as Lied vou Liebi, Wörmi, Glǜck.
Drùm muess a grada Seisler Maa
doch Frǜǜd ù Stouz am Hiimtütsch haa!
Seislertütsch, i chann i dier
as wy im Spiegù ds Ländli gsee
mit Bärg ù Fäud ù Waudrevier
ùn Aupegluet am Schwarze See,
as wärchigs Vöuchli, gsùnn ù chäch,
ù Dorf ù Huus ù Meie dra
ù Härrgottschrüz de Wääge naa!
Quelle: https://www.sagw.ch/fileadmin/redaktion_sagw/dokumente/Publikationen/Sprachen_und_Kulturen/1-NWB-Reihe/seislerdeutsch.pdf